ପଶ୍ଚିମ ଓଡ଼ିଶା ସହ ସମ୍ପର୍କ ସୁଦୃଢ଼ କରିବାକୁ ସାମାଜିକ, ପରିବେଶ ଓ ଯାତ୍ରୀମୁଖୀ ପଦକ୍ଷେପ
ଝାରସୁଗୁଡା,: ଝାରସୁଗୁଡାସ୍ଥିତ ବୀର ସୁରେନ୍ଦ୍ର ସାଏ (ଭି.ଏସ୍.ଏସ୍.) ବିମାନବନ୍ଦର ପକ୍ଷରୁ ଯାତ୍ରୀ ସୁବିଧା ଦିବସ ଉତ୍ସାହ ଓ ଆଡମ୍ବର ସହ ପାଳନ କରାଯାଇଛି। ଭାରତୀୟ ବିମାନବନ୍ଦର ପ୍ରାଧିକରଣ (ଏଏଆଇ) ନେତୃତ୍ୱରେ ଆୟୋଜିତ ଏହି ଦିନବ୍ୟାପୀ କାର୍ଯ୍ୟକ୍ରମରେ ଯାତ୍ରୀ ସେବା, ପରିବେଶ ସୁରକ୍ଷା, ସାମାଜିକ କଲ୍ୟାଣ ଓ ଯୁବପିଢ଼ିଙ୍କ ପ୍ରେରଣାକୁ ପ୍ରାଧାନ୍ୟ ଦିଆଯାଇଥିଲା।
କାର୍ଯ୍ୟକ୍ରମର ଆରମ୍ଭରେ ଆଗମନ ଦ୍ୱାରରେ ପହଞ୍ଚୁଥିବା ଯାତ୍ରୀମାନଙ୍କୁ ପାରମ୍ପରିକ ଟିକା ପିନ୍ଧାଇ ସ୍ୱାଗତ କରାଯାଇଥିଲା। ପରେ ଟର୍ମିନାଲର ସିକ୍ୟୁରିଟି ହୋଲ୍ଡ ଏରିଆ (SHA) ରେ ଏଏଆଇ, ସିଆଇଏସଏଫ, ରାଜ୍ୟ ପୁଲିସ, କଷ୍ଟମ୍ସ ଏବଂ ବିଭିନ୍ନ ବିମାନ ସଂସ୍ଥାର କର୍ମଚାରୀମାନେ ଏକତ୍ରିତ ହୋଇ ଜାତୀୟ ସଙ୍ଗୀତ ‘ବନ୍ଦେ ମାତରମ୍’ ଗାନ କରି ଦେଶପ୍ରେମର ବାର୍ତ୍ତା ଦେଇଥିଲେ।
ବିମାନବନ୍ଦରର ସଫଳତାରେ ଅଗ୍ରଣୀ ଭୂମିକା ନେଉଥିବା ପରିଚ୍ଛନ୍ନତା କର୍ମୀ ଓ ସଫାଇ କର୍ମଚାରୀଙ୍କୁ ସମ୍ମାନିତ କରାଯାଇଥିଲା। ଏହା ସହିତ ବିମାନ ଚଳାଚଳ କ୍ଷେତ୍ରରେ କାର୍ଯ୍ୟରତ ମହିଳା କର୍ମଚାରୀମାନଙ୍କ—ଚେକ୍-ଇନ୍ କାଉଣ୍ଟର, ସୁରକ୍ଷା ସେବା ଓ ଜରୁରୀକାଳୀନ ବିଭାଗରେ ନିଯୁକ୍ତ ମହିଳାମାନଙ୍କ—ଅବଦାନକୁ ମଧ୍ୟ ସ୍ୱୀକୃତି ଦିଆଯାଇଥିଲା।
ପରିବେଶ ସୁରକ୍ଷା କ୍ଷେତ୍ରରେ ବିମାନବନ୍ଦର ପକ୍ଷରୁ ‘ପ୍ଲାଷ୍ଟିକ ମୁକ୍ତ ବିଶ୍ୱ’ ସଚେତନତା ଅଭିଯାନ ଆରମ୍ଭ କରାଯାଇଥିଲା। ଶକ୍ତି ସଞ୍ଚୟ ସମ୍ପର୍କିତ ପ୍ରଦର୍ଶନୀ ସହ ପାଶ୍ୱର୍ବର୍ତ୍ତୀ ଓ ଦୂରଦୂରାନ୍ତ ଅଞ୍ଚଳରେ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏଥିରେ ସ୍ଥାନୀୟ ସ୍କୁଲ ଓ କଲେଜ ଛାତ୍ରଛାତ୍ରୀ, ବନ ବିଭାଗର ଅଧିକାରୀମାନେ ଯୋଗଦେଇଥିବାବେଳେ ଯାତ୍ରୀମାନଙ୍କୁ ମାଗଣାରେ ଚାରା ବଣ୍ଟନ କରାଯାଇଥିଲା।
ସାମାଜିକ କଲ୍ୟାଣ ଦିଗରେ ବିମାନବନ୍ଦର ପରିସରରେ ଏକ ମାଗଣା ସ୍ୱାସ୍ଥ୍ୟ ଶିବିର ଆୟୋଜନ କରାଯାଇ ରକ୍ତଚାପ, ରକ୍ତଶର୍କରା ଓ ବଡି ମାସ୍ ଇଣ୍ଡେକ୍ସ (BMI) ପରୀକ୍ଷା କରାଯାଇଥିଲା। ସ୍ଥାନୀୟ ବିମାନବନ୍ଦର ଟ୍ୟାକ୍ସି ଚାଳକମାନଙ୍କ ପାଇଁ ବିଶେଷ ଚକ୍ଷୁ ପରୀକ୍ଷା ଶିବିର ମଧ୍ୟ ଆୟୋଜିତ ହୋଇଥିଲା।
ଯୁବପିଢ଼ିଙ୍କୁ ବିମାନ ଚଳାଚଳ କ୍ଷେତ୍ର ପ୍ରତି ଆକୃଷ୍ଟ କରିବା ପାଇଁ ସ୍ଥାନୀୟ ଛାତ୍ରଛାତ୍ରୀଙ୍କ ପାଇଁ ବିମାନବନ୍ଦର ପରିଦର୍ଶନ, ବୃତ୍ତିମୂଳକ ପରାମର୍ଶ ଶିବିର, କୁଇଜ୍, ପ୍ରବନ୍ଧ ଓ ଚିତ୍ରାଙ୍କନ ପ୍ରତିଯୋଗିତାର ଆୟୋଜନ କରାଯାଇଥିଲା।
ସାମ୍ବାଦିକ ସମ୍ମିଳନୀରେ ବିମାନବନ୍ଦର ନିର୍ଦ୍ଦେଶକ କହିଥିଲେ ଯେ, ଆଧୁନିକ ଏୟାର ଟ୍ରାଫିକ୍ ପରିଚାଳନା ବ୍ୟବସ୍ଥା, ସାମାଜିକ ଦାୟିତ୍ୱମୂଳକ କାର୍ଯ୍ୟକ୍ରମ ଏବଂ ସୋସିଆଲ ମିଡିଆ ମାଧ୍ୟମରେ ଡିଜିଟାଲ ପ୍ରଚାର ଭି.ଏସ୍.ଏସ୍. ବିମାନବନ୍ଦରକୁ ଏକ ଆଧୁନିକ ଓ ବିଶ୍ୱସ୍ତରୀୟ ଶିଳ୍ପ ଦ୍ୱାର ଭାବେ ପରିଚିତ କରାଉଛି। ଗତ ୧୨ ବର୍ଷ ମଧ୍ୟରେ ଏକ ଅଚଳ ଏୟାରଷ୍ଟ୍ରିପ୍ ଠାରୁ ଏହା ଏକ ସଫଳ ଆଞ୍ଚଳିକ ବିମାନ କେନ୍ଦ୍ରରେ ପରିଣତ ହୋଇଥିବା କଥା ସେ ଉଲ୍ଲେଖ କରିଥିଲେ।
