ବିଜେପୁର:ଗ୍ରାମାଞ୍ଚଳରେ ଜଳ ସମ୍ପଦ ସୁରକ୍ଷା ଓ ପରିବେଶ ସନ୍ତୁଳନ ରକ୍ଷାରେ ପଡ଼ା ଗ୍ରାମ ଏକ ଉଦାହରଣ ସୃଷ୍ଟି କରିଛି। ଗ୍ରାମର ପ୍ରାଚୀନ ‘ବଡ଼ ବନ୍ଧ’ର ପୁନଃଉଦ୍ଧାର ପାଇଁ ସ୍ଥାନୀୟ ମହାଲକ୍ଷ୍ମୀ ପୂଜା କମିଟୀ ପକ୍ଷରୁ ବୃହତ ସଫେଇ ଓ ସଂସ୍କାର କାର୍ଯ୍ୟକ୍ରମ ଆରମ୍ଭ ହୋଇଛି।
ବହୁ ବର୍ଷ ଧରି ପଙ୍କ ଓ ଅବହେଳାରେ ପଡ଼ିଥିବା ଏହି ପୋଖରୀ ନଷ୍ଟ ହେବା ଆଶଙ୍କାରେ ଥିଲା। ଗ୍ରାମବାସୀଙ୍କ ଜଳ ସମସ୍ୟା ସମାଧାନ ସହ ଭୂଗର୍ଭ ଜଳସ୍ତର ବୃଦ୍ଧି କରିବାକୁ କମିଟୀ ଏହି ଦାୟିତ୍ୱ ନିଜେ ନେଇଛି।
ଏହି ଅଭିଯାନରେ ପୋଖରୀରୁ ପଙ୍କ ଓ ଦଳ ସଫା କରାଯାଉଥିବା ସହ ବନ୍ଧର ଚତୁଃପାର୍ଶ୍ୱକୁ ସୁଦୃଢ଼ କରାଯାଉଛି। ଆଗାମୀ ଦିନରେ ଜଳର ସ୍ୱଚ୍ଛତା ଓ ସୁରକ୍ଷା ପାଇଁ ବିଭିନ୍ନ ଯୋଜନା ମଧ୍ୟ ଗ୍ରହଣ କରାଯାଇଛି।
ମାନ୍ୟବର ବିଜେପୁର ବିଧାୟକ ସନତ କୁମାର ଗଡ଼ତୀୟାଙ୍କ ନିର୍ଦ୍ଦେଶକ୍ରମେ ଏହି କାର୍ଯ୍ୟ ଆରମ୍ଭ ହୋଇଥିବା ବେଳେ, ବିଜେପୁର ଗୋଷ୍ଠୀ ଉନ୍ନୟନ ଅଧିକାରୀ (BDO) ସରୋଜ କୁମାର ବିଶ୍ବାଳ ଓ ସହକାରୀ ଯନ୍ତ୍ରୀ (AAE) ପ୍ରିୟଙ୍କା ବେହେରା ସ୍ଥଳ ପରିଦର୍ଶନ କରି ବୈଷୟିକ ମାର୍ଗଦର୍ଶନ ଦେଇଛନ୍ତି।
ଏହି ପୁଣ୍ୟ କାର୍ଯ୍ୟରେ ଗ୍ରାମର ବୁଦ୍ଧିଜୀବୀ, ଯୁବଗୋଷ୍ଠୀ ଓ ସମାଜସେବୀମାନେ ଏକତ୍ର ହୋଇ ଶ୍ରମଦାନ କରୁଛନ୍ତି। ଗୋପାଳ ମେହେର, ଆନନ୍ଦ ବାରିକ, ହେମନ୍ତ ମେହେର, ଶାନ୍ତନୁ କୁମାର ମିଶ୍ର, ବିଶିକେଶନ ମେହେର, ସୁବଳ ପଧାନ, ଉମେଶ ମେହେର ଓ ଧର୍ମରାଜ ମେହେର ପ୍ରମୁଖ ଏହି କାର୍ଯ୍ୟରେ ସକ୍ରିୟ ଭାବେ ସାମିଲ ହୋଇଛନ୍ତି।
ପଡ଼ା ଗ୍ରାମର ‘ବଡ଼ ବନ୍ଧ’ କେବଳ ଏକ ଜଳାଶୟ ନୁହେଁ, ବରଂ ଏହା ଗ୍ରାମର ସାମାଜିକ ଓ ସାଂସ୍କୃତିକ ଜୀବନର କେନ୍ଦ୍ରବିନ୍ଦୁ। ଏହାର ପୁନଃଉଦ୍ଧାର ଦ୍ୱାରା ଚାଷ କାର୍ଯ୍ୟ ଓ ପଶୁପାଳନରେ ବିଶେଷ ଲାଭ ହେବ ବୋଲି ଆଶା କରାଯାଉଛି।
ସମୂହ ଉଦ୍ୟମ ଓ ସମାଜିକ ସହଯୋଗ ଥିଲେ ଯେକୌଣସି କାର୍ଯ୍ୟ ସଫଳ ହୋଇପାରେ ବୋଲି ପଡ଼ା ଗ୍ରାମ ପ୍ରମାଣ କରିଛି। ଏହି ପଦକ୍ଷେପ ବିଜେପୁର ବ୍ଲକ ପାଇଁ ଏକ ଆଦର୍ଶ ରୂପେ ପରିଗଣିତ ହେଉଛି।